కాలువలో కొట్టుకొచ్చిన రూ.2000 నోట్ల కట్టలు!

ఈ కాలంలో.. డబ్బెవరికి చేదూ అన్నట్టు ఆ డబ్బుకోసం ఏ గడ్డి తినడానికైనా వెనుకాడని పరిస్థితి నెలకొంది. మరి అలాంటి డబ్బు కట్టలు కట్టలు ఓ కాలువలో కొట్టుకొస్తే.. ఇది చూసే వారు కలా నిజమా అనే సందిగ్ధంలో పడిపోతారు. ఇది మాత్రం నిజం కట్టల కొద్ది రెండువేల రూపాయల నోట్లు ఓ సరస్సులో తేలుతూ కనిపించాయి. రాజస్థాన్ లోని ఓ సరస్సులో రూ.2వేల నోట్ల కట్టలు కొట్టుకురావడం స్థానికులను షాక్​కు గురిచేసింది. పోలీసులు హుటాహుటిన అక్కడకు వెళ్లి వీటిని స్వాధీనం చేసుకున్నారు. 

వివరాల్లోకి వెళితే..

రాజస్థాన్​ అజ్మీర్ లోని ఆనాసాగర్ కాలువలో కొన్ని పాలిథీన్​ బ్యాగులో రూ.2వేల నోట్ల కట్టలు కొట్టుకు వచ్చాయి. స్థానికులు ఇది గమనించి పోలీసులకు సమాచారం అందించారు. అక్కడకు చేరుకున్న పోలీసులు పాలిథీన్​ బ్యాగులో ఉన్న డబ్బును స్వాధీనం చేసుకున్నారు. మొత్తం 30 నుంచి 32 నోట్ల కట్టలు ఉన్నాయని, అన్నీ రూ.2వేల నోట్లే అని అధికారులు చెప్పారు. అయితే ఈ నోట్లు నకిలీవా? లేక నిజమైనవా? అనే విషయం తెలియాల్సి ఉందని పోలీసులు తెలిపారు. చూడటానికి మాత్రం నిజమైన నోట్ల లాగే ఉన్నాయని, నీటిలో తడవడం వల్ల నిర్ధారించుకోలేకపోతున్నట్లు చెప్పారు. ఎవరో గుర్తు తెలియని వ్యక్తులు ఈ నోట్ల కట్టలను పాలిథీన్​ బ్యాగులో పెట్టి కాలువలో విసిరేశారని వివరించారు. నిపుణుల సాయంతో నోట్ల అసలువో, కాదో తెలుసుకుంటామన్నారు అధికారులు.