న్యూయార్క్ లో అర్ధరాత్రి అలజడి...ఏలియన్స్ పనే అంటూ !

పేరుకి అమెరికా అగ్రరాజ్యమే కాని వారు నమ్మే విషయాలు ఒక్కోసారి నవ్వు తెప్పిస్తూ ఉంటాయి. మన వాళ్లకి మూడ నమ్మకాలు ఎంత ఉంటాయో వారికీ అంతే ఉంటాయి. మన వాళ్ళు దెయ్యలకి భయపడితే అక్కడి వాళ్ళు గ్రహాంతర వాసులకు(ఏలియన్స్) భయపడతారు. తాజాగా అక్కడి న్యూయార్క్ నగర ప్రజలు అర్ధరాత్రి పూట హడలిపోయారు. ఎందుకంటే ఆకాశమంతా నీలిరంగులోకి మారి వెలుగులు విరజిమ్మడంతో ఏలియన్స్ దాడికి వస్తున్నాయని ఎవరో పుకారు పుట్టించడంతో అందరూ హడలిపోయారు. అదీ కాక సోషల్ మీడియాలో ఈ ఘటనకు సంబంధించిన వీడియోలు, ఫొటోలు వైరల్ కావడంతో అందరూ నిజమేననుకుని భయపడిపోయారు. అసలు ఏం జరుగుతుందో ఎవరికీ తెలియని పరిస్థితి నెలకొంది. అయితే ఈ వెలుగుల కారణంగా స్థానికంగా విమానాల రాకపోకలకు సైతం అంతరాయం కలిగింది. కానీ కొద్దిసేపటి తర్వాత ఈ వెలుగు వెనుక ఉన్న అసలు కారణం తెలుసుకున్న ప్రజలు ఒకరి ముఖం ఒకరు చూసుకుని నవ్వుకున్నారు. ఎందుకంటే స్థానికంగా ఉన్న కాన్ ఎడిసన్ అనే విద్యుత్ కంపెనీ ప్రాంగణంలో ఉన్న ట్రాన్స్ ఫార్మర్లకు మంటలు అంటుకుని పేలిపోయాయి. అందులోని రసాయనాలకు నిప్పు అంటుకోవడంతో ఒక్కసారిగా దట్టమైన పొగతో పాటు నీలి రంగు వెలుగు ఈ ప్రాంతమంతా వ్యాపించింది. ఈ విషయాన్ని న్యూయార్క్ పోలీసులు ట్విట్టర్ లో పోస్ట్ చేశారు. దీంతో అంతా ఊపిరి పీల్చుకున్నారు.